Ալավերդու ավելի քան 500 աշխատող ունեցող պղնձաձուլական գործարանը հոկտեմբերի 19-ին դադարեցրել է աշխատանքը։ Գործարանի աշխատակիցներն արդեն ծանուցում են ստացել աշխատանքից ազատվելու մասին, որից հետո փակել են դեպի Վրաստան տանող մայրուղին՝ ի նշան բողոքի, հայտնում է «Ազատություն» ռադիոկայանը:

«Վալլեքս» խմբի՝ ՎՏԲ բանկին ունեցած խոշոր պարտքի դիմաց գործարանն անցել է ռուսաստանյան այդ բանկին։ Մեկ ամիս առաջ «Վալլեքս» խումբը կորցրել էր նաև Թեղուտում շահագործվող հանքավայրը:

Չնայած ընկերության համար ստեղծված ֆինանսական խնդիրներին, մեկ շաբաթ առաջ գործարանում տեղի էր ունեցել հանրային քննարկում, որտեղ գործարանը շահագործող Էյ-Սի-Փի ընկերությունը վերջնագիր էր փոխանցել կառավարությանը՝ նշելով, որ իրենց 3 պահանջը չբավարարելու դեպքում կդադարեցնեն աշխատանքը։

Բնապահպանական խախտումների համար մեկ ամիս առաջ 387 միլիոն դրամով տուգանված ընկերությունը կառավարությունից պահանջել էր չեղարկել տուգանքն ու 6-7 անգամ բարձրացնել արտանետումների սահմանային թույլատրելի նորմերը։

Փոխվարչապետ Տիգրան Ավինյանն ու ընկերության սեփականատեր Վալերի Մեջլումյանը բանակցել են, սակայն փաստորեն արդյունք չտված բանակցությունների մասին դեռևս պաշտոնական հաղորդագրություն չկա։